瞓醒食完早餐就 check out，出發去玩啦。朝早我哋會去旭山動物園，由市中心揸車過去半個鐘左右，响東門入口停車場泊好車就去買飛入場，大人820円，小學生免費。好低玩。動物園好大，有好多唔同動物嘅種類，一般嘅老虎、豹、猿猴類、鳥類、長頸鹿、河馬第都有，較為特別嘅係有一個區域專飼養咗北海道獨有嘅動物同鳥類。大部份動物三儍都响書或電視見過，但親眼見到都仲係第一次，所以三儍都睇得好開心，邊睇邊不停問問題。之後我哋再去探埋呢度嘅主角—北極熊同企鵝。北極熊館好早就已經排哂長龍，為咗見佢一面我哋都乖乖排隊，好彩唔係等好耐，睇完北極熊同肥嘟嘟嘅企鵝，唔經唔覺已經到午餐時間，我哋就响東門入口嘅餐食午餐。餐廳價錢唔算貴，包埋飲品任飲每個set都係1仟円左右，而且味道唔錯，份量都ok。食飽飽我哋就去下一站。
下一站我哋去美瑛嘅白金青池，雖然好多年前我哋已經嚟過美瑛，大部份景點都去過，但就未去過白金青池。由旭川揸車去車程其實50分鐘左右，但因為白金清池實在太出名太多遊客去，搞到大塞車，足足要2個鐘先到，泊好車行幾分鐘就到目的地。雖然之前已經睇過白金清池嘅相，但親眼見到都有驚艷嘅感覺，深藍色嘅天空配靛藍色嘅湖水，加埋枯樹嘅倒影，好似張明信片咁靚。我哋慢慢行，映下相欣賞下咁靚嘅景色，逗留咗一個鐘左右就離開啦。
趁仲有陽光，我哋就去埋美瑛其他景點映相。美瑛嘅風景加埋夕陽嘅光線，隨便映都好似幅畫咁靚。太陽落山開始天黑，我哋就揸車去酒店嘞。
今明兩晚我哋會住富良野站附近嘅 Hotel Bellhill。原本計劃响富良野住民宿，不過好評嘅民宿唔平，而且大部份都無獨立衛浴間，有嘅就更加貴，加上我哋三個細路驚嘈親人，所以決定住酒店。富良野嘅酒店好貴，呢間一家五口連早餐2萬7仟円一晚，响旺季嚟講算係平。我哋去到酒店已經差唔多7點，check in 咗就上房。我哋book 酒店前睇過酒店d 相，預計會比較殘舊，點知酒店原來翻新咗，梳化地毯都係新，感覺好乾淨企理，雖然我哋book和式房但酒店安排咗三房床俾我哋，但因為想早d出去食飯唔想嘥時間換房。放好行李我哋就出去食晚餐。
之前做資料搜集，知道响富良野開得夜d嘅食店唔多，大部份集中响車站附近。我哋揀咗食燒肉。燒肉店名叫平和苑，店面雖然較殘舊，但d嘢就好好食，佢用道內嘅牛肉豬肉，全部都好香好嫩滑，連牛腸牛潤呢d内臟都好香無羶味，食飽飽好滿足我哋就返酒店。
酒店其實仲有得浸溫泉，泉質都ok，我哋舒舒服服浸完溫泉就休息喇。
（day 3 完）
沒有留言:
發佈留言