一早起身，執好行李我哋落樓下食早餐。早餐選擇唔算多，不過就幾好食，食飽就拎埋行李check out ，搭返京成電鐵到成田機場。我哋今日會搭ANA嘅內陸機去北海道，搵到內陸機嘅couter check in 之後見仲有時間我哋就响機場行陣睇下飛機就預備上機。
由成田飛北海道大概個半鐘機程，到埗拎埋行李就去租車公司攞車。租車公司响機場只係得營業 counter，對好資料就搭租車公司嘅shuttle bus 去租車公司。我哋今次响Budget租咗一架MV級嘅車，10日要9萬円左右，另外再用9仟3百円買埋10日嘅HEP (Hokkaido Express Pass)，做好手續俾哂錢就攞車。陪住我哋十日嘅係㗎都幾舊款嘅Wish，我哋一家五口連埋三大一小嘅喼都叫勉強塞得入㗎車，搞掂哂就開車去第一站旭川。
由新千歲開車到旭川大概要2個幾鐘，中途响休息站食午餐，食飽繼續開車，3點半左右到埗。今日我哋無特別行程，所以只係响 Aeon Mall 行下街。行完就去酒店Check in。
今晚我哋住嘅酒店係Smile Hotel，酒店位置好方便，價錢亦唔太貴，但就比較舊，而且亦無自己嘅停車場，雖然我哋住嘅係三床房，但其實只係雙人房再加床，而且衛生情況普通，不過好彩只係瞓一晚，放好行李我哋就出去食晚餐。
今晚我哋去居酒屋食飯，我哋叫咗串燒、炒飯、燒味噌蟹膏、炸鷄等，炒飯好好味，三儍一人分一碗好快食哂要再叫第二碟，串燒同幾他小食都幾好食，呢餐唔算好平，連飲放題要1萬円多d。食飽就去便利店買飯後甜品同早餐就返酒店休息啦。
(Day 2 完)
沒有留言:
發佈留言