今曰去涉谷同原宿行街，行咗一陣百貨公司想食 lunch，就一家三口去番車站附近食壽司。壽司店 12 點鬆ｄ已經排曬長龍，好彩我哋未係好肚餓啫，排咗半個鐘輪到我哋有得喇，我哋每人叫咗個特上壽司 set ，個 set 包括有蟹膏味噌沙律、茶碗蒸、15件特上壽司同甜品。見到貼住今日伊勢海老一隻賣 2仟6百幾円就叫咗一隻，個 waiter 姐姐好鬼開心。死嘞！唔係搞錯 100g 2 仟幾円係咪呀，唔理喇，食咗先算！先上咗蟹膏味噌沙律同茶碗蒸，蟹膏味噌沙律好鮮甜，而茶碗蒸就分咗俾洛洛食，洛洛食到好滋味！
上主菜喇，唔只我哋，連其他顧客都睇到 O曬咀，原來咁大盆，ｄ刺身好多，起碼有20片，刺身好鮮味，肉質彈牙爽口，好好味！食完已經飽咗一半。其實見到隻海老個頭仲有好多膏，條尾仲有好多肉， 但係就食唔到，好嘥！之後再上壽司 set，15 件壽司都好新鮮好靚，食完飽到嘔，點之仲有嘢上，原來係頭先隻伊勢海老剩低嘅頭同尾煮嘅湯，一d都唔浪費，雖然已經好飽，但見到咁正，死都要飲埋佢，湯好 鮮甜，但實在太大碗，最後都飲唔曬。食飽埋單走人，結果隻伊勢海老真係賣2仟6百幾円咋！真係低到嘔！
食飽做 shopping 運動，由涉谷行去原宿，收獲唔錯，最緊要係點買都平過 i.t.。行到6點幾係時侯返酒店 join 埋早幾日到埗嘅姑媽姑丈，一齊去食晚飯。
今餐去蟹道樂食蟹，每人叫咗個定食，都幾好味，尤其個燒蟹脚認真唔錯。今餐又係食到超飽，食完行返酒店，由於聽朝要早起，執好行李沖完涼就休息嘞！
沒有留言:
發佈留言