今日好早起身，梳洗食早餐等埋姑媽姑丈就出發去上野。姑媽姑丈話想睇吓櫻花，所以我哋去上野公園碰吓運氣，洛洛就最開心，因為可以四圍走。雖然未到花期，不過有部份櫻花都開咗，仲開得幾靚！
我哋映吓相就離開上野公園，去アメ橫行街，行咗一陣就食 lunch，今餐食刺身飯，不過唔多新鮮，ｄ海膽仲有陣異味，食到我有ｄ反胃！食完就先去ニ木の果子掃零食手信，再行去日產上野 outlet 攞車。行咗好耐先到，辦完手續攞咗車就揸車返酒店，架車係 Lefesta ，行咗過萬公里，都頗殘舊，連 CD 盤都無。跟住 GPS 兜咗一陣先番到酒店，攞曬ｄ行埋上車就出發去輕井沢嘞！
初初以為由東京去輕井沢好快，點知原來要成三個幾鐘。中途响驛站食吓嘢休息咗一陣再起行，下午5點先到酒店。酒店面積好大，設施仲包括滑雪 場，golf 場同 factory outlet 等等，我哋呢兩晚住 cottage ， check in 咗仲要坐 suttle bus 去我哋嘅 cottage。Cottage 响滑雪場隔離，外表唔太新淨但裏面都好正，有兩間房連廳，無冷氣但有暖氣設備，地板仲鋪咗暖管，踩上去暖笠笠嘅，成間 cottage 俾我哋感覺好好，好舒服。
放好行李再 call suttle bus 去攞車，揸車出去超市行吓兼買嘢今晚打邊爐。我哋買咗ｄ豬肉、菜、刺身等，ｄ嘢多到食唔曬，食飽就覺覺啦！
沒有留言:
發佈留言