對沙巴嘅認識係之前睇過一個飲食節目，講某名廚去沙巴食好嘢。基於為食心態就決定同埋爺爺嫲嫲、姑媽姑丈、我哋一家五口（？）一行8人就出發去沙巴玩幾日。由於自己已經有咗5個幾月身紀，而且有老有嫩，所以好可惜哋今次唔可以出外島，取而代之係揾間靚d嘅酒店住幾日。
哥哥學校好早已經開始放暑假（費事俾人話逃學！），所以可以趁旺季前出發，慳番唔少。出發之前幾日細佬發高燒，好彩響上機之前一日退哂燒兼出埋玫瑰疹，所以可以安心出發。
我哋今次坐港龍，由於同行有bb，所以之前已經一早已經打咗電話去預訂bb籃、bb同兒童餐同坐位。去程隻機都好full，所以我哋d位隔開咗一行。不過唔知係空姐唔記得，定係佢地搏我哋唔問，去程無俾bb籃我哋，我哋唯有抱住細佬，好彩機程唔太長，我哋11點幾就到咗沙巴喇。落咗機過海關攞咗行李，就見到有local tour嘅職員拎住我哋嘅名接機，習齊人數就坐旅遊巴去我地住嘅酒店喇。
於我之前已經send咗 e-mail同酒店溝通，所以酒店已經安排咗bb床俾我哋，而且up grade咗去海景房，間房雖然唔算好大，但係就有個露台同個無敵海景，再加上張好舒服嘅king size床， 我同我d團友都好滿意。我地安頓好，洗個臉換件衫就出去市中心行下。由酒店去市中心只係10分鐘車程，不過坐的士就要成 MYR20，真係幾貴。我哋先搭的士去 Center Point Shopping Mall唱錢，坦白講，個商場旺就旺，不過好較舊，好似黃金商場，所以我哋唱咗錢就走，去揾嘢食。
我哋先去附近嘅富源茶餐廳食tea。佢哋用自助型式，自己要食乜就拎乜，拎完就去比錢，我哋每樣試d，係個咖央多幾好味，其餘都係麻麻地。食完就響附近行一陣，買咗張上網用既sim card預備嚟緊幾日自駕時，用嚟上goggle map當GPS用，跟住我地就去返Center Point Shopping Mall地庫嘅超級市場買d零食飲品（d嘢一d都唔平）， 再搭的士返酒店喇。
返到酒店由於大家都好攰，所以決定先小睡一陣，今晚就係酒店食buffet。酒店嘅buffet無香港嗰d又生蠔又龍蝦咁豪華，不過都幾多選擇，d嘢都幾好味，最重要嘅係一d都唔貴，只係＄200左右，都幾低食，而哥哥就最開心，因為佢好鍾意食buffet，我哋食到飽飽就返房休息喇。
（day 1 完）
沒有留言:
發佈留言