今朝好早就被d雀仔嘈醒咗，原來我哋間房露台有個雀巢，叫醒哥哥睇完一輪，我哋就去食早餐。早餐響噚晚我哋食buffet嘅餐廳，8點鬆d去到已經好多人，我哋坐好就去攞嘢食，酒店早餐好豐富，有專人煎蛋整奄列煮湯粉同整pancake，仲好細心咁整咗corner 專俾小朋友自己拎嘢食，不過因為馬來西亞係回教國家，所以無豬肉食，連腸仔煙肉都係牛肉或雞肉整，食落有少少怪啫。
諗住煲好粥仔俾細佬，瞓下先再出去玩，點知個肚唔爭氣，d腸抽筋，個肚仲越嚟越痛，為安全計迫住我放棄去玩，響酒店休息，而哥哥就同姑丈姑媽爺爺嫲嫲出去巿中心行街。個肚仔痛，個人又攰，瞓下醒下連午餐都無食好快就太陽落山，原來酒店房可以見到日落，因禍得福可以攤響床上面欣賞沙巴日落美景，而哥哥佢哋都啱啱返到酒店，一齊睇完日落，見個肚無咁痛我哋就出發去食晚飯。
今晚我哋去巿中心嘅雙天食海鮮，餐廳格局似西貢d海鮮酒家，放哂d海鮮出嚟俾d客自己揀，揀好就同職員商量點煮。我哋點咗東風螺、酒煮蜆、老虎蝦、蒸東星魚腩、通菜同燒雞翼。講真，d海鮮好新鮮好靚，但煮法就好局限，唔係清蒸就白烚，好似嘥咗d咁靚嘅食材，所以呢餐感覺都係普普通通。食飽我哋就返酒店休息啦。
(day 2完）
沒有留言:
發佈留言