花花世界@北海道 - Day4 28/6/2008 洞爺湖＞苫小牧＞帶廣＞富良野

今日行程全日都係為咗食，雖然好多時間響架車度，但絕對值得！起身梳洗後先去食早餐，對天祥真係好失望，早餐選擇好少，好唔掂！食完上房執好行李就 check out，離開洞爺湖。途經洞爺湖公園同展望臺，落車行咗一陣，映嚇相，又上車向苫小牧出發。開車無耐又有警察查車，今次佢哋 check 得好認真，又查駕駛執照又 call 上台 check，足足搞咗成20分鐘先放人。

我哋隨即向苫小牧進發。睇地圖好似好近咁，但行車用咗差唔多3個鐘，此行目的為咗去試早前一個電視節目介紹過嘅食北寄貝哋食堂。食堂位於碼頭邊，去 到已經大排長龍，姑媽姑丈先排隊，我哋一家三口就同爺爺嬤嬤去附近菜市場行咗一陣，買咗 d 士多啤梨做飯後果。等咗一陣就有位喇，坐低睇嚇餐牌先，嘩！估唔到咁平，一個響螺刺身都係￥1000，我哋叫咗響螺刺、北寄貝刺身丼飯、咖哩北寄貝飯、北 寄貝拉麵、北寄貝湯、黑椒牛油炒北寄貝，燒北寄貝同海膽，埋單都唔駛￥9000。ｄ嘢又鮮甜又好味，真係超值。食飽先去附近西松屋補給，再出發去帶廣。

上車無耐因為飯氣供心，大家都瞓晒覺。由苫小牧去帶広所需時間仲耐，我哋兩點幾上車六鐘先到，揸咁耐車專程為咗碗豚肉飯，但實在值得，豚肉 juice 到不得了，肉質又鬆又軟，佩埋個燒汁簡直一流，食完再去附近買埋好出名嘅焗番薯，就揸車去富良野，到達 New Furano Hotel 已經 11 點，check in 之後就休息。

（day 4 完）