花花世界@北海道 - Day3 27/6/2008 函館＞大沼公園＞有珠山＞洞爺湖

半夜3點幾醒咗，睇完歐聯就預備出門口，去函館朝市行兼食早餐。函館朝市比想象中細，但都幾多嘢睇，仲越睇越肚餓，卒之忍唔住去咗食個丼飯做早餐。 飲飽食醉行多一陣又出發返酒店，途經一個小市場，泊好車又落車行吓。個小市場類似香港嘅街市，ｄ嘢都幾平，買咗ｄ水果上車返酒店 check out。

Check out 咗就開始我哋呢個旅程嘅長途車嘞，我哋今晚响洞爺湖住，會途經大沼公園及有珠山。上車無耐除咗揸車嗰個之外，大家都瞓晒。兩個幾鐘之後就到達大沼公園。大 沼公園俾我感覺似返咗國內嘅公園咁，一樣有小橋流水，行咗一陣上車再去有珠山。好快就到有珠山喇，近距離睇個活火山都幾特別，原先諗搭纜車上山，但可惜纜 車維修，我哋唯有响山腳食ｄ嘢，眏吓相就離開。

越接近洞爺湖就越多警察，我哋架車仲俾警察截查，不過因為見到有 bb，所以好快放行。到咗今晚住嘅天祥喇，未入門口先打個突，佢哋將我個名寫咗响歡迎嗰個牌度，但老老實實，我覺得似死鬼咗响儐儀館個牌咁，好彩我百無禁 忌啫！Check in 咗上房，打開門不其然"嘩"咗一聲，因為間房超大，仲對住無敵湖境，但望真ｄｄ陳設都幾殘舊。由於 check in 時 found desk 個職員同我哋講今晚會好多人响度住，提醒我哋早ｄ去食晚餐，所以我哋梳洗吓就落樓食飯。今晚係 buffet ，但真係無乜嘢好食，簡直令人失望。叫個求其食飽之後就上房休息等睇煙火大會，我哋仲自備水果邊食邊睇，睇完就去浸温泉，個温泉都幾殘舊，浸咗一陣就返房 休息嘞！