今日我哋會開始自駕遊。一早起身食完簡單嘅早餐就check out。搭JR去到難波嘅Times 攞車。Times嘅職員好好人，不過做手續就好慢，要個幾鐘先可以搞掂晒手續攞到車。我哋租嘅係S2級嘅車，嚟緊五日都係會揸Toyota Corolla Fielder，雖然係五人車，但勝在有個大行李箱，除咗可以放到二個大喼一個細喼外，大家都可以坐得舒服。我哋返酒店拎完拎埋行李就出發去鳥取。
由大阪揸車落鳥取差唔多要三個鐘頭車程，到埗已經點幾，我哋先去Aeon Mall 嘅Food Hall 食過簡單嘅午餐，再揸15分鐘車就到鳥取沙丘。鳥取沙丘係日本政府指定為天然紀念物，入選日本地質百選。今日天氣好熱，加埋沙丘嘅沙漠天氣簡直熱到抖唔到氣，雖然咁熱，但三儍見到咁大嘅沙丘都衝咗過去，由入口行上去沙丘最高點距離雖然唔太遠，但因為天氣好熱，加上d沙好鬆軟，所以行上去都幾辛苦，不過咁辛苦都值得，上面望落嚟嘅風景好靚，除咗可以望到沙丘嘅全景之外，仲可以欣賞到一望無際嘅日本海。三儍行到上去意猶未盡，仲要行埋落去沙灘。沙灘d水好清涼好乾淨，舒舒服服浸完腳之後我哋就慢慢行返出去啦。
响沙丘入口洗完腳，休息一陣見時間尚早，就去埋隔離嘅沙之美術館，今期用印度文化做主題，沙雕比想像中靚，好有立體感，好精緻。雖然入場費唔平，但原來遊客有入場優惠，可以用優惠嘅價錢欣賞到咁靚嘅沙雕真係好值得花時間嚟呢度行下。
行完美術館我哋就去附近超市補給，再返去市中心嘅酒店check in。我哋今晚住嘅係响車站附近嘅Green Morris Hotel，由於酒店無三人房，所以我哋5個人要book 2 間雙人房住，酒店幫我哋安排咗2間房响隔離方便照應。房好大，設備都好新，感覺好舒服。放好行李我哋就出去食飯啦。
鳥取市入夜後好靜，好多食店好早就閂舖，選擇唔算太多，行咗一個圈最後決定去居酒屋食晚餐，居酒屋叫炉端かば，係集團經營，d嘢都幾好食，尤其係佢招牌嘅炭燒雞肉，我哋仲叫咗當做嘅生蠔，呢種生蠔品種係夏輝，係鳥取縣獨有嘅品種，配合埋特製嘅醬汁又鮮甜又肥美。食飽飽我哋就返酒店，去大浴場浸完浴就休息喇。
（day 3 完）
沒有留言:
發佈留言