難得今年聖誕節有假放，又搵到價錢合理嘅機票，今年一於帶三儍去日本過聖誕。我哋今次搭嘅係樂桃嘅零晨機，提早食完晚餐就出發到機場，等到點幾終於等到上機，坐定定大家就預備瞓，雖然個位唔係坐得好舒服，不過都是叫做瞓得著，三儍直頭好好瞓。差唔多6點左右就到埗，我哋過咗海關拎埋行李買埋早餐就搭 JR 嘅 Haruka到京都。
到咗京都我哋先將行李寄到酒店再出發去玩。第一站我哋先去京都鐵路博物館，之前有去過大宮同名古屋嘅鐵路博物館，其實玩嘅同睇嘅嘢大部份都差唔多，博物館下層主要展示唔同嘅火車，好多都可以行上去映下相，而上層係我哋逗留得最多嘅地方，因 為有好多有關火車嘅小遊戲玩，我哋仲好好彩抽到可以著住鐵路職員制服揸模擬火車。京都最嘅特別之處係有一個好大嘅扇型車庫，裏面展示左好多唔同款嘅蒸氣火車，俾多三佰円仲有行搭蒸氣火車。搭完蒸氣火車我哋映多陣相去紀念品店買完嘢我哋京就去食午餐。
午餐我哋去京都車站食炸牛扒。去到雖然已經差唔多過咗午餐時間，但仍然有條人龍，我哋排咗半個鐘多d先有食。我哋一人叫咗一set炸牛排定食，午排炸得啱啱好，外脆內軟，牛味香甜，可能大家太肚餓，所以好快就食哂。食飽飽我哋就返就返京都站搭JR去大阪。
我哋返至大阪先去酒店check in，放低行李休息一陣。我哋今晚住嘅Hotel Mystay御堂筋本町，响哋鐵嘅御堂筋線本町站行幾分鐘就到。酒店响商業區，入夜之後就比較靜，不過附近都有便利店可以行下。我哋今晚住嘅係雙人房，三儍免費入住外仲送一人一套盥洗套裝氹到三儍好開心。間房唔算好大，不過好整齊清潔，感覺好舒服。
休息一陣我哋就出去行街睇燈飾。基本上由酒店行出大馬路就係光之饗宴嘅埸地，馬路邊嘅樹全部掛滿咗燈泡，好靚。我哋一邊沿住馬路行一邊映相，好快就到咗心齋橋。响心齋橋行下街就預備食晚餐喇。
原本今晚想食燒海鮮，可惜行咗好幾間店唔係無位就係見我哋有細路唔招呼。大家飢寒交迫之下決見到有間食ShabuShabu放題就決定改變主意。呢餐其實唔平，但食物水準一般，肉味唔夠濃，反而其他小食好似炸雞同涼伴青瓜就幾唔錯。食飽我哋就搭地鐵返酒店休息喇。
（day 1 完）
沒有留言:
發佈留言