哥哥慶生兼細佬第一次坐飛機遊曼谷 day1 17/3/2012

閉關差唔多兩年，終於可以去旅行。今次會同埋只得六個月大嘅細佬去曼谷，話就話同哥哥慶祝五歲生日，實際上係想食下行下街攤抖下。今次我哋去咗四日，中牛機去下晝機返，好處係唔駛晨咁早摷醒兩個細路，可以俾佢哋瞓晏d ，走又唔駛太趕，又唔會太夜先返到香港，影響佢哋休息。 

今次同行因為多咗小朋友，為免麻煩決定自己揸車出機場，十一點左右到咗機場check in咗之後就去 Burger King食個早餐，再預備上機。 今次我哋搭泰航，隻機差唔多滿，我哋坐定定之後就起飛啦，細佬一路都好合作，除咗起飛嗰刻有d不安之外都無乜扭計，好快仲瞓埋，隻機飛定咗空姐仲好快安裝個bb籃俾細佬瞓添。食過都幾好味既飛機餐之後細佬就起身，我哋影下相，好快就到咗曼谷啦！

落咗機先唱錢，不過機場個rate比較低，所以我哋靜係唱咗少少，夠錢出downtown就算。過海關好多人，不過d staff見到我哋帶住bb，所以帶我哋去第二條隊排，快好多。 

出咗海關我就先餵飽細佬，爹爹就去買sim card。我哋任務完成就去搭的士出去，的士站頭有職員幫我哋安排的士，佢見我哋行李多，就比咗架大車我哋，不過要成700bat， 比之前300bat貴好多，不過無辦法，好彩個司機好醒目，好快就到咗酒店啦。今次我哋住Grande Centre Point Ratchdamri，地點就係響Four Season隔離，都叫做幾方便，酒店勝左房間夠大，而且係apartment，有廳有房有埋open kitchen，哥哥就最開心，因為夠哂地方比佢走動。由於之前已經同酒店溝通好，所以佢哋已經準備咗bb床比細佬，哥哥就會同我哋同床。

換好衫洗個面就出去喇，我地先去Big C，而爹爹就去 Super Rich唱錢，匯合咗再去Central World 食晚飯。應哥哥要求，我哋今晚食日式燒烤放題，等咗一陣就有位。 呢度用炭火燒烤，d食物選擇都幾多，幾好食，不過衛生就麻麻，晌我哋食食下途中有隻小小強響檯面散步，我用個碗襟住佢，再話比個waiter聽，點知一打開隻碗，隻小小強就投身火海，去都咁嘅地步我地乜胃口都無哂，唯有埋單就人，而張單就平咗100bat俾我哋。

下一站就再返兜Big C， 我哋買咗唔少日用品，零食手信，跟住就返酒店休息啦。

（Day 1 完）