關西行 Day 4 奈良＞難波 2008-10-24

今日起身睇天氣報告，奈良天氣麻麻，但因為嚟關西最大目的係去奈良餵鹿，所以依照行程。我哋撘南海電鐵，好快就到咗奈良。出咗車站向右行上斜坡就係 奈良公園範圍，行咗無耐就見到鹿嘅失蹤影，d鹿好友善，企响路中心任模唔嬲，初初仲估洛洛會驚，點知佢好有興趣望住隻鹿，望完一輪仲伸手摸，一路摸一路卡 卡笑，引到其他遊客圍觀映相。

摸完一輪隻終於鹿發現我哋無嘢俾佢食，好無癮咁走咗，我哋又繼續向前行，沿途都有d鹿行嚟行去，行咗一段路先搵到有鹿餅賣，買咗一份鹿餅嚟餵鹿，d鹿係咁追住問我哋攞嘢食，洛洛又餵得好開心，好快就餵完。見天陰陰開始想落雨，就決定返大阪。

返到大阪時間尚早，我哋就去咗松屋町買手信，相比起ニ木の果子，松屋町少好多選擇，下次可以慳番唔嚟，買咗手信拎番酒店就去食午餐。

午餐去咗魚心食壽司，途經一間土耳其炒雪糕，老公話想食，買咗一杯奶茶味嚟試，又估唔到幾正喎，雪糕又滑又香濃，正！輪到食正餐嘞，ｄ壽司好新鮮，又大大件，雖然價錢唔算平，但尚算低食，老公仲話總之一早嚟食添！

食飽又做運動，即係 shopping，今次行難波 park ，到而家先發現難波 park 先啱我哋行，行咗一輪買咗唔少嘢，係時候番酒店放低戰利品去食晚餐，今晚食松板牛，價錢其實唔太貴，每人叫咗個 ￥7800 嘅 set ，包咗前菜、牛肉刺身、牛壽司、三款稀有部位嘅松板牛同一塊牛扒作網燒，丼飯或冷麵同甜品。ｄ牛肉真係好靚好甜，入口融化，最緊要係洛洛大部份時間瞓咗， 唔阻住食嘢，瞓醒又有隔離枱有個哥哥陪佢玩，都不知幾開心，食飽就番酒店，執嘢預備聽日 check out。