關西行 Day 2 大阪＞京都＞梅田 2008-10-22

今日好早起身，事關要去京都一日遊。梳洗後響酒食早餐，酒店早餐係自助形式，但講真，真係無嘢好食。食完就搭地鉄到梅田，再轉 JR 到京都，由於今日撞啱舉行三大祭祀之一嘅時代祭，往京都嘅列車都幾多人。到咗京都站我哋再轉車到嵯峨野，原先想搭觀光小火車，但因為無訂票所以放棄，改為 行吓嵐山算數。

落咗車行咗無耐就見到之前 non-no 介紹過嘅甜品店，入去食ｄ嘢抖抖再起行，點知洛洛扭計係咁喊，因為拍騷擾其他人，唯有拿拿聲食完埋單人。

沿路行去渡月橋，四圍ｄ建築物同環境都好靚；渡月橋亦都好靚，雖然未正式到紅葉季節，但有部份樹葉已經開始轉紅或黃，而且四周空氣都好新鮮，成個環境都俾人好舒服嘅感覺。

映完一輪相行番去天龍寺，原先想穿過天龍寺去竹林，行到入去先發現此路不通，要出咗天龍寺再向前行先到竹林入口。竹林面積比想象中大，古竹參 天，另有一種風味，一路行已經開始落雨，沿住竹林行一路有指示牌話可以去到嵯峨野小火車車站，商量後決定撘小火車再轉 JR 返京都，點知好辛告去到車站先知呢個站只落客不上客，車站職員教我哋向市街方向行，行番去 JR 嵯峨野站。我哋聽佢講話行20分鐘，但實際上行咗超過半個鐘，其間仲要勁大雨，老公差唔多全身濕透。

幾經辛苦返到京都，原本下一站去清水寺、祗園等地方，但雨越落越大，而且已經好掃興，泱定取消剩底京都嘅行程，先響京都駅食ｄ嘢，再返大阪，我哋求其揾咗間食京料理，又唔錯喎。

飽返梅田行街，晚餐食迥轉壽司，因為今曰大攰，食完飯買甜品就番酒店休息！