嚟緊會有新遊記，所以要儘快完成呢個遊記，唔可以再拖呢！
旅程接近尾聲，我哋嘅活動範圍亦由郊區返到去市區。起身响酒店食完早餐就出去行街街，其實我哋原本plann咗去摘桃，不過桃期已過，所以決定轉為响熊本市行一陣街，再出發去鳥栖市。
嚟到鳥栖有兩樣嘢一定要做，就係去季樂食燒肉同行outlet。我哋由熊本揸車去到季樂已經半差唔多2點，好彩仲未收舖，等咗陣就可以入坐。我哋叫咗一份5-6人前嘅咗賀牛，另外配白飯同湯。等咗一陣d燒肉就嚟嗽，除咗牛d肉之外，個set仲有豬肉，雞同牛腸，d牛肉好肥美，雪花紋好靚，急不及待燒好牛肉食，d牛肉好鮮甜好有牛味，入口即溶，好味，除咗牛肉之外其他肉都好新鮮好好味，不過因為人哋3點鐘打烊，所以要極速食完成個set，食到好飽埋單，去隔離嘅農產品市場行咗陣就去outlet行街。
Outlet 距離季樂只係5分鐘左右路程，泊好車就開始行街shopping，三儍對shopping興趣不大，但好彩outlet裏面有雪糕店，又有Lego shop可以分散一下佢哋嘅注意力，俾到時間我放血。行到咁上下天陰陰想落雨我哋就走喇，攞車去今晚嘅酒店。
好彩我哋早一步走，去到酒店已經開始落起大雨嚟。我哋今晚响outlet附近嘅 Chisun Inn住。酒店係一般商務酒店，諗住就自己行程先 book 呢度，但估唔到幫我哋check in 嘅staff 態度好差，同對住本地人係兩個樣，見我哋5個人book一間房黑口黑面，話我哋超過指定人數入住，唔俾我check in，好彩我book酒店不嬲寫足係有2大3細入住，而confirmation e-mail都有清楚寫明入住人數，我show俾佢睇佢即時無聲出，好不情願同我哋check in。搞掂手續就上房，間房都預咗係細，但放咗行李之後都算有路行，我哋稍事休息就出去食飯。
鳥栖係工業區，入夜後比較靜，加大家都仲有d飽，所以就求其去食香港都有嘅日式咖哩店食晚餐。食完行下附近便利店，再番酒店pack行李同休息啦。
（day 9 完）
沒有留言:
發佈留言