今日嘅行程好簡單，就係全日都响市中心行街。朝早梳洗食咗簡單嘅早餐就出去啦，第一站就去酒店附近嘅心齋橋商店街行，去咗GU同Uniqulo買衫比三儍，又去咗唔同嘅扭蛋店扭蛋，眨吓眼就過咗兩個幾鐘，三儍話咁快就肚餓，要食午餐啦。
心齋橋周圍都係遊客，要搵到位唔易，最後去咗間迴旋壽司食，一個字，伏。食物水準同壽司郞差唔多，唔叫難食，但完全無特別，不過舖頭衛生程度麻麻，快快脆脆食完就走，總結係呢餐嘥咗quote。
食完我哋就去日本橋行街。日本橋最出名嘅係賣嘅係動漫同遊戲周邊，好似東京秋葉原咁，由道頓堀行過去唔使20分鐘就到，嗰度有好多大大小小賣二手動漫product 嘅舖頭好似駿河屋，亦有好多分店嘅Animate ，仲有間好大規模嘅扭蛋店，三儍响度行咗兩個鐘已經買到心頭好。行完日本橋之後我哋就行返酒店放低戰利品。
响酒店休息一陣再出去心齋橋，不過今次就去配眼鏡。日本配眼鏡價錢平之餘款又靚，而且驗眼機用英文，唔怕因為言語不通而搞到配錯度數，不過就幾嘥時間，成個過程用咗差唔多二個鐘，搞掂就去食晚餐。
今晚我哋去國產牛食燒肉放題，幾年前食過驚為天人，決定今次嚟大阪都要食。入坐揀好套餐就可以用平板點嘢食，由於大家都好肚餓，好快就已經叫到一枱都係，d肉比一般燒肉放題店食到嘅高級，蝦依然咁好味，甜品都整得好靚好有水準，不過可能太有期一，所以覺得今次反而無乜驚喜。
食到好飽好飽，見時間仲早，就响Donki同道頓堀行行咗陣，再返酒店浸浴休息啦。
(day 2 完）
沒有留言:
發佈留言