好耐無出過po，因為武肺原因，大家都去唔到旅行，加上22年我哋離開咗香港，所以旅行方式唔同咗，雖然22年年尾有去過日本東北，23年暑假都有去過曼谷，但兩次旅行都係同屋企人/朋友去，唔方便出po。今次終於久違地一家五口去日本喇，三儍亦已經由小朋友變成青少年，希望唔會嚇親大家。
今個trip我哋由香港出發，搭UO嘅中午機去大阪。機票好早已經買定，原本諗住三儍已經大個，唔駛訂定位，點知出發前無耐爆出搶位事件，加上知道暑假期間UO counter 排哂長龍，所以最後除咗訂位之外仲買埋U-First，加埋行李費基本上夠買傳統航空公司機票，所以下次响香港出發都未必再搭UO喇。
順利check in 就上機，機程4個鐘左右，不過班機因為日本機場問題delay ，所以要到5點先到埗，拎咗行李就搭南海電鐵Rapid 出難波，再行去心齋橋嘅酒店Check in。
我哋未來5晚會住心齋橋Super Hotel Premier Namba，貪佢有溫泉可以行完一日街之後鬆下，而且酒店勁近心齋橋，方便行街食飯。之前住過SuperHotel已經有心理準備間房會幾細，不過估唔到細到連開喼都好困難，我哋一家五口已經係book 兩間相連嘅三人房，但由於佢係碌架床，下格床係標準雙人床，仲要放埋張枱仔，所以攪到間房好窄，一個人坐响床邊另一人都行唔到，幾經辛苦安頓好d行李，就出去食飯。
我哋已經又攰又肚餓，所以晚餐求其响酒店附近嘅鳥貴族解決。雖然坐Rapid嗰陣已經買咗飯團食，但一個飯團點夠填飽發育時期嘅胃，所以一坐低就不停落order，誇張到個店長過嚟問我哋知唔知每碟係兩串，係咪真係order 咁多，担心我哋食唔哂。
一輪狂風掃落葉之下終於喂飽三儍，埋單後就行去酒店10分鐘左右嘅玉出超市補給同買早餐，之後返酒店浸溫泉就休息啦。
沒有留言:
發佈留言