我哋今日午餐就係去錦系町食鯛魚湯麵,雖然已經差唔多過咗午飯時間,但依然有條長龍,我哋排咗半個鐘終於有得入座。麵店以自助形式落單,我哋先去售票機買咗飛,入座時就將張飛交俾店員,等咗一陣就有麵送上,不過唔知係咪餓得制眼花,我哋想食拉麵但就㩒錯咗沾麵,雖然都係鯛魚湯底,但個湯就濃好多,食落好黏口,雖然好好味,但我哋就最怕呢種痴笠笠嘅感覺,所以食咗一大半就放棄,希望下次有機會再嚟食過佢嘅拉麵啦。
食飽飽跟住嘅節目就係行街街,我哋先去原宿行咗一陣,之後再轉戰池袋,行到d舖頭收檔我哋先去食晚餐。今晚係呢個trip最後一晚,原本想食壽司,但响西武嘅地下行咗好耐都搵電梯上去食店樓層,最後決定放棄,去車站附近食燒肉放題。雖然間燒肉店通風麻麻煙霧瀰漫,但勝在用炭火燒烤另有一番風味,而且d肉都幾靚幾新鮮,店員仲好好人請三儍飲汽水。飲飽食醉我哋就返酒店執行李休息啦。
(day 14 完)
沒有留言:
發佈留言