我臨近年尾要清假，原本只係諗住响屋企休息下，後尾發現三少學校有幾日放假，忽發奇想想同小三去旅行，問準屋企人就book 機票酒店。由決定去旅行到正式出發都係一個星期左右，目的地係日本福岡。
原本可以揀朝早機，不過唔想太早太辛苦我哋揀咗中午機。check in 之後就過海關，醒唔起行李有把軍刀搞咗一輪先過到關，原本諗住食過午餐先上機，結果淨係可以買過麵包等上機之前食。今次我哋搭嘅係 HK Express，小三唔駛同哥哥掙嘅情況下可以有得坐窗口位所以零捨開心。
機程4個鐘食下嘢玩下瞓下好快就過咗，我哋拎埋簡單嘅行李過關之後就坐機場免費 shuttle bus 去國內線轉地鐵到博多。落車之後就去酒店check in。因為今次得我哋兩個婦孺，所以揀間規模大d嘅酒店。我哋今晚住嘅係 ANA Crowne Plaza，間房唔係好大不過好舒服， 一大一細住啱啱好。
放好行李就爭取時間出去行街街，離開酒店都已經7點幾，所以只可以响博多站附近嘅電器舖行下街，話就話係電器舖，但其實裏面有玩具睇有衫買，行到咁上下就去食晚餐喇。
今晚係去小三指定食嘅居酒屋，我哋叫咗串燒、炸雞，燒大蝦同炒飯，d嘢大大份，好彩好好味，如果唔係一大一小一定食唔哂。食飽飽又唔想返酒店住，最後決定去酒店附近嘅超級市場同便行下，買埋雪糕甜品就返酒店喇。
（day 1 完）
沒有留言:
發佈留言