我哋嘅目的地係消防博物館，搭Metro去到四谷三丁目站就直接去到博物館。去到先拎咗入館証就可以入去參觀。三儍一入已經勁興奮，因為見到好多架古董消防車同救護車，應三儍要求不停幫佢哋同d消防車合照，擾嚷一輪先可以再上樓上。博物館有10層，除咗有3層係屬於office同消防局之外，其餘7層都有唔同嘅嘢睇同玩。我哋先去咗做手工，整救護車模型，再去睇下日本以前同而家嘅消防裝備，而最好玩嘅係有得著下消防員嘅制服，上消防車同消防直升機映下相。玩咗差唔多3個鐘，買埋少少紀念品就離開去食午餐啦。
午餐我哋去食炸牛扒，呢間炸牛扒响涉谷，係間長龍餐廳，去之前已經有哂心理預備要等位，但諗住落雨濕濕應該會少d人排隊，點知一排就差唔多2個鐘，其間雨勢時大時細，我哋又帶住3個細路都幾狼狽，好彩三儍尚算合作，除咗問得未呀好肚餓呀之外都無乜點扭計。由於間餐廳真係好細，就算排到我哋都唔可以一齊食，要分兩批入去食。我哋每人叫咗一份炸牛排定食，份定食好快就送上，牛扒炸得好嫩，但牛味其實唔係好重，都叫幾好食，但值唔值排兩個鐘嚟食就見仁見智。由於太肚餓嘅關係，用咗10分鐘左右就食完呢餐，埋單7千円左右，跟住就去行街。
我哋搭Metro去到原宿。頭先三儍等位等到好攰，為咗俾佢哋抖下又有多d時間俾我掃貨，所以由爹爹帶佢哋搵間餐廳坐低食下甜品，我就自己行街街。
行完街去餐廳會合之後就返酒店放低d戰利品兼稍事休息，再去酒店附近嘅居酒屋食晚餐，呢餐其實唔平，都要8千幾円，但d嘢就普普通通無乜特別，食完就去便利店買雪條雪糕做甜品，雪條反而好驚喜，好好味，食完就休息喇。
(Day 2 完)
沒有留言:
發佈留言