今日我哋會去嵐山坐嵯野小火車，車票係之前托人嚟日本玩時預早買定嘅，見仲早有少少時間，我哋就由酒店行去京都站，睇好似好近實際行起上嚟都要差唔多20分鐘，好彩都趕得切撘JR落去嵯峨野站，落車行過隔離嘅小火車車站，交咗車票就响月台等火車嚟。火車好快就到，三儍見到火車好興奮，上車搵到我哋嘅位坐好就開車喇，火車一程30分鐘，沿住保津川去到龜岡站，原途風景幾靚，如果就啱時間睇到櫻花或者滿山紅葉應該會仲靚。去到龜岡站我哋就原車撘翻去嵯峨野站，結束小火車之旅。
係時侯要食午餐，我哋撘JR翻京都站再轉地鐵到烏丸四条，再行去錦市場食晏。我哋今日食蠔，餐廳就响錦市場裏面，有提供唔同煮法嘅蠔，仲有壽司同其他海鮮。我哋點咗生蠔、燒蠔、吉列蠔、壽司同燒蝦。生蠔好新鮮好肥美好甜，一d都唔鯹，燒蠔就普普通通，吉列蠔都好鮮甜，而最驚喜就係唔知用乜嘢魚整嘅壽司真係好好味，食完一碟再叫多兩碟。
食完蠔係時侯食甜品，我哋埋單之後就去對面舖食雪糕，雪糕都幾好食，好香濃綠茶味，食完就行錦市場。我哋全家都好鐘意行街市，慢慢行下睇下，仲買咗唔少乾貨零食，好快就行到收市，跟住行埋週邊嘅商店街，行到人哋收舖，係時候要食晚餐。
由於大家已經攰，所以揀咗間响香港都有嘅燒肉店食放題，點知中伏，d食材好麻麻，上菜慢，唔太乾淨，雖然未食到夠時間，但我哋都覺得無謂再嘥時間，所以埋單走人。
我哋返到酒店就去大浴場沖涼加浸浴，大浴場唔算好大，但設備都好齊全，連小朋友嘅櫈仔同沖涼洗頭液都有，沖乾淨涼浸一陣浴真係好舒服，浸完浴出去買牛奶飲，再返房食完甜品就瞓覺啦。
沒有留言:
發佈留言