2024-8 三儍襲關西四國 day 6 23/8/2024

 一早起身食完簡單嘅早餐我哋就check out，拎埋行理去酒店附近嘅Toyota Rent-A-Car攞車，租車公司職員好快手，已經預備好哂所有文件，唔駛一個鐘已經可以開始我哋嘅自駕遊。我哋今次租嘅係係Noah Hybrid，車款同之前响香港揸開嘅一樣，不過就低階好多，但就勝在可以坐哂5個人之餘仲夠位放5個人嘅行李，而價錢尚算合理，連埋保險同異地還車7日都唔駛12萬円。

自駕第一站就係去Costco。我諗好多去咗英國嘅香港人都係Costco 嘅會員，不過英國嘅Costco極度唔爭氣，d貨好多都買唔落手，但日本嘅Costco就唔同，就算買唔走去行下都係一種享受。我哋揀咗順路嘅尼崎分店行，呢度唔算好大但我哋想買嘅嘢好似零食食材衫褲都搵到，雖然d肉同海鮮又平又靚，但可惜唔可以帶返英國，取而代之係買咗一盤壽司上車食。Costco 嘅壽司果然係名不虛傳，好新鮮好好食，比噚日去壽司政食到嘅更加好味。食完整理好行李就出發去下一站喇。

下一個目的地係淡路島，雖然有個超强台風行緊嚟日本，但今日意外地好天，沿途風景加埋藍天白雲真係靚到不得了，大概一個半鐘高到咗我哋今日食lunch嘅餐廳-海王市場喇。我哋今餐揀咗食BBQ，買咗鮑魚及淡路牛BBQ各一set，另外再追加一碟淡路牛同炸魷魚圈，海鮮超新鮮，牛都好好食，就連個set裹面嘅蔬菜都好鮮甜，而最正係可以對個無歒大海景燒嘢食，我哋食完午餐响附設嘅手信店行咗一陳就再出發啦。

淡路島有好多好靚嘅公園可以行下，原本我哋都有安排去，但因為食完飯已經三點半，加上天氣實在太曬太熱所以放棄咗，改為早少少去酒店check in抖下。我哋今日住嘅係淡路島洲本溫泉嘅旅館夢海遊，揸車去到酒店門口就有職員幫忙拎行李，check in就由職員帶我哋上房。我哋今晚住嘅係和洋室，間房好大，而且新裝修好，最正嘅係對住海景，坐响tatami d 坐墊對住海景勁舒服。我哋休息咗一陣就去浸溫泉。呢間酒店有兩個溫泉，一個响本館，另一個响我哋住嘅別館隔離嘅別邸，我哋先浸別邸嗰個溫泉，由我哋房行過去都一分鐘左右，周圍環境好同個溫泉都好新好靚，舒舒服服浸完溫泉返房抖陳就去食晚餐。

晚餐係半自助形式，食物種類以西式為主，選擇唔算好多，不過食物好精緻好好食，主食係意粉，食完都已經飽咗一半，甜品係即叫即整，又靚又好味。食完飯我哋再去本館嘅溫泉再浸多轉，溫完溫泉就返房休息喇。

(Day 6完)

2024-8 三儍襲關西四國 day 5 22/8/2024

今日係最後一日全日响大阪，全日都係行街買嘢。噚日玩得太攰，今日我哋瞓晏少少，瞓醒就去响天滿嘅春駒食壽司，呢間壽司出名平靚正，去到已經見到有人排緊隊，不過望真，原來今日春駒臨休，條隊係排對面嘅壽司政，上網search 咗一輪都搵唔到附近有乜好食，最後我哋都排隊去壽司政食。呢度嘅魚生都尚算新鮮，但以手握壽司嚟講個師傅到整得幾求其，尤其個鐵火卷岩巉到不得了，可以講話唔合格，加上間舖勁窄，又唔太乾淨，所以我哋食完一輪就埋單。由於三儍未夠飽，我哋再去附近嘅7-11買d小食同飲品，食完就去梅田shopping。

第一站就响梅田站附近嘅Yodobashi行，呢度除咗賣電器之外仲有成層賣玩具模型，三儍行到唔捨得走，我响呢度都買到我想買嘅美容機。買完嘢行多陣就去食下午茶。下午茶我哋揀咗去大丸嘅HARBS食水果蛋糕，去到條龍都幾長，不過好彩嗰度有冷氣兼有得坐住排，排咗大概半個鐘左右就可以入坐啦，我哋每人叫咗一件蛋糕加一杯飲品，蛋糕種類好多，我哋叫咗朱古力蛋糕、蜜瓜蛋糕、水蜜桃Mouse蛋糕同最經典嘅什果千層蛋糕，d蛋糕全部都好好食，水果鮮甜，海綿蛋糕鬆軟又唔會乾爭爭，Cream又滑又香，最緊要係成件蛋糕唔會死甜，四款蛋糕之中最好味嘅係千層水果蛋糕，上枱一陣就秒清，下次嚟日本一定要再食過。

食飽有力可以繼續行街，我哋行完Hep Five同埋附近嘅Uniqlo又差唔多夠鐘食晚餐。

今晚我哋食呢期好紅嘅爐端燒力丸，呢間爐端燒好多YouTuber 介紹過，驚會好多人嚟食所以我哋預先訂咗位。可能我哋人多兼有小朋友，所以無安排我哋坐火爐邊，有少少可惜。不過呢度d嘢又真係算又平又好食，大部份食物都係¥330一份，我哋叫咗一般居酒屋都有供應嘅炸雞、炸雞皮、炸蝦，呢度好出名嘅燒物好似串燒set、燒雞翼、燒蝦、燒帆立貝同燒飯團等。食飽飽我哋又去附近嘅Round One夾公仔，交咗咁多學費，今次終於有收穫，俾二少夾到隻比卡超，玩完食飽就早啲返酒店執行李，預備聽日離開大阪啦。

(Day 5完)

2024-8 三儍襲關西四國 day 4 21/8/2024

今日係呢個trip其中一個重點，就係大阪環球影城-USJ喇。其實我哋十年前都嚟過USJ，但三儍嗰陣太細，好多機動遊戲都玩唔到，大部分時間只係留响Snoppy同芝麻街園區影下相。今次再嚟原因都係因為好想去Nintendo World 玩，加上三儍都大咗，可以玩d刺激d嘅遊戲，所以預留一日嚟呢度玩。

預計暑假嘅USJ又熱又多人，所以去之前已經做咗功課，決定買VIP套票；VIP都有幾款，我哋買咗VIP5，好處係响5個鐘內由專責導遊帶住，行職員通道直達要玩嘅機動遊戲，完全唔駛排隊，連買嘢食買爆谷桶都唔駛排隊，壞處就係貴同難買，最後我哋响trip.com貴官網少少嘅價錢買咗V5。

本身响trip.com買VIp捆綁式要買埋接送服務，所以今日我哋食咗早餐就响酒店直接坐車去USJ，大概半個鐘左右就到。一路我哋都無同三儍講我哋買咗VIP，直至去到USJ經佢哋VIP入口入場佢哋先知，所以佢哋勁興奮。入到去核對咗資料之後，職員幫我哋戴上手帶就出發去玩喇。本身我哋嘅VIP時段由12點開始，但之前用手帶就可以當fast pass 用。我哋先玩咗大白鯊，之後就去咗Minion Park，嗰度好靚，d公仔勁得意，玩咗一個game就係時候去lounge會合導遊開始VIP時段啦。

Lounge 有自助飲品bar，冷熱咖啡、茶、汽水都有，坐低等咗陣導遊就嚟啦。我哋今日嘅導遊居然係位外國人，可以全程用英文溝通，導遊分發咗頸帶，商量好行程就出發喇，我哋先玩咗超刺激嘅Hollywood 過山車，之後就到咗我哋最想去嘅Nintendo World 喇。嗰度真係好靚，好似入咗遊戲世界咁，嗰度有兩個game，Yoshi’s Adventure可以坐定定影吓相，欣賞下園區嘅風景；而Mario Kart就好似真係打緊機咁，緊張刺激好好玩。玩完兩個game就去水世界喇。

水世界係個劇場表演，當係中途休息，我哋邊睇表演邊食攤檔買嘅小食做午餐。個表演都幾精彩，有唔少爆炸場面，完show之後導遊叫我哋唔好走住，原來VIP睇呢個show除咗有特定座位之外，仲會安排演員同我哋影相，好驚喜。

之後就爭取時間玩埋Minion 另外一個game-瘋狂乘車遊喇。呢個game係一個3D ride，唔算刺激，但好逼真好好玩。玩完已經兩點，原本以為導遊都會安排我哋睇parade，而事實上佢都有同我哋再三確認過睇parade有機會濕身係咪都ok，我哋都話無問題，點知佢帶咗我哋去睇柯南劇場，雖然我哋有提過想睇柯南，但有亦提過parade嘅優先次序絶對係柯南之上，唔係好明點解會咁安排，但嘅然都到咗劇院，而且三儍都講過想睇，所以就照去睇，不過事後都有後悔，因為都幾悶（我認我有瞌着咗），而且都幾嘥時間。

睇完已經三點，跟住我哋就去玩鬼滅之刃XR 過山車，個人認為呢個係最好玩，本身有追開呢套動畫，帶埋副VR眼鏡玩過山車就好似親歷其景入咗動畫裏面咁，好刺激好過癮。玩完之後就去Harry Porter World玩鷹馬飛行，呢個過山車比Hollywood 嗰個小兒科好多，不過都幾好玩，玩到四點個VIP tour 亦夠鐘完結。總括嚟講買咗VIP係舒服好多，唔使同人迫排餐死，但唔知係咪外國人導遊嘅關係，完全冇日式細緻服務嘅感覺，直程覺得呢個導遊有啲求其，尤其佢無視我哋要求安排我哋去睇柯南嗰下真係有啲無言。

我哋之後繼續用VIP手帶當fast pass 用，玩埋Harry Poters禁忌之旅，响呢度遇到一個都幾無禮貌嘅Staff，大家都嬲到想投訴。不過好彩個game都好好玩所以算數。玩完我哋就喺附近嘅舖頭行吓，差唔多夠鐘就去食飯。

晚餐係VIP tour包埋，响Lombard’s Landing 食半自助餐，湯可以揀什菜湯或洋蔥湯，主菜可以揀牛或三文魚，頭盤小食甜品就可以自己出去拎，如果湯同主菜唔夠可以再order ，另外飲品全包，連香檳紅白酒都有；呢度d嘢食選擇唔算好多，不過d嘢都好好食，而且餐廳服務好好，完全係fine dine規格。好奢侈咁用咗一個半鐘食完飯就繼續去玩喇。

原本想玩多一次鬼滅之刃過山車，不過經過見到人頭湧湧決定放棄，最後去咗玩Mario Kart。雖然排fast pass，但都要排半個鐘先玩到。玩完就去Minion Park玩攤位遊戲同行下手信店，唔經唔覺已經到9點半，我哋已經响呢度玩咗12個鐘，大家已經好攰，我哋去lounge休息一陣，拎返之前買咗嘅嘢就離開USJ返酒店喇，雖然今日嘅行程用咗好多錢，但換嚟係寶貴經驗同回憶，都算值得嘅。

（day4 完）

2024-8 三儍襲關西四國 day 3 20/8/2024

今朝起身梳洗之後我哋就去酒店附近嘅星乃咖啡店食早餐。早餐menu 選擇唔算好多，但最特別嘅係有得揀㗎喱飯。早餐嘅份量偏細，味道不過不失，勝在杯咖啡都幾好飲，食完我哋就出發去京都喇。

由心齋橋搭Metro再轉JR，差唔多一個鐘先到京都。之前已經有心理準備，知道京都勁多遊客，但行出去車站見到去清水寺㗎巴士條人龍嗰刻真係想搭車返去大阪，等咗一陣巴士大家已經熱到全身濕晒，最後決定call Uber上清水寺，雖然比巴士貴一倍，但係唔駛等兼直到上三年坂，舒服好多。由三年坂行上清水寺段路唔長，不過就好多嘢睇，我哋買咗好香嘅七味粉同食咗雪條先正式入寺。其實三儍唔係第一次嚟清水寺，不過呢度風景真係好靚，好值得再嚟行吓。我哋响度行下映下相差唔多一個鐘就走啦。

我哋call車返落去烏丸四条食午餐。由於大家都好熱，所以一致決定食涷蕎麥麵，餐廳係根據goggle map 評分搵嘅，叫名代おめん ，價錢唔算貴，大概¥2000一個set，不過份量都幾足，而且好好味，蕎麥麵同烏冬都爽滑彈牙，天婦羅唔油膩，連d前菜都好好食。食飽我哋就响附近行吓，响我哋最鐘意嘅鴨川映下相，消化咗午餐就去食下午茶。

下午茶就去我哋最愛嘅辻利茶舖食甜品，一人叫咗一款甜品，有焙茶刨冰、焙茶新地同抹茶新地，同之前食嘅一樣咁好食，食完再嘆返杯熱焙茶，超正 ！

食飽飽就坐阪急電鐵返去大阪，車程一個鐘多啲啱啱好俾我哋上車瞌一陣。抖足精神落車就去車站嘅百貨公司行街，收獲好豐富，我哋返酒店放低啲嘢就再出去食晚餐。

由於之前食得太飽，到咗晚餐時間大家都唔係好肚餓，所以只係响酒店附近食拉麵。間舖之前都有YouTuber介紹過，專食龍蝦湯拉麵嘅。我哋除咗拉麵之外仲叫咗炸雞塊同炸雞翼，炸物好香口又唔油膩，雞肉好嫩；拉麵湯勁香蝦味，拉麵好彈牙。雖然我哋唔係好肚餓，但因為d嘢好食，所以都食清哂。食到飽飽就搵地方行下。

見時間尚早，我哋去咗附近Round One夾公仔，由於我哋係初哥，交咗唔少學費都無收獲，不過三儍都玩得好開心，準時10點就有工作人員提示叫所有小朋友離場，我哋都乖乖地離開啦。下一站就去酒店附近嘅Life 超市買早餐，間超市好大好多嘢賣，熟食壽司仲做緊特價，好低食，玩完一輪嘅三儍又話開始肚餓，所以我哋都買咗壽司同串燒返酒店做燒夜。食完再去浸浴就休息啦。

(Day 3完)